I ha das nid gwüsst.
Bisi vornes paar Wuche eis probiert ha.
Würum weisi ou nümme gnau, wüu i ha Süessgetränk nie würklech gärn gha.
Und em Coca-Cola-Konzärn hani sowieso scho lang dr Kampf agseit.
Aber denn hets irgendwie eifach müesse si.
Bi döune Überzügige dörfe ou Usnahme si,
isch mini Überzügig.
Und jiz isches äbe leider würklech so gsi, dass das Cola richtig fein gsi isch.
I de nöchschte paar Wuche isch bi jedem Ichouf ou es Dösli vo dere Zuckerflüssigkeit
i mim Ichoufswägeli glandet.
Näbe Biogmües, Pflanzemiuch und Vouchornbrot.
I ha mi a dr Kasse aube fasch nid chönne zrüghaute.
Hät gärn aune Umstehende gseit: I trinke süsch nie Cola!
I verurteile dUsbütig vo Land und Lüt i Entwickligsländer!
Gott sei Dank bini verschont blibe, wo im Himmu z Sucht-Gen verteilt worde isch
und mini Cola-Phase isch gli wieder zÄnd gsi.
Aber mini moralischi Integrität het e Knacks übercho.
I ha mini eigete Wärte verrate.
Füre Gnuss.
Und vilech drum so fescht zBedürfnis gha, mi z rächtfertige.
Nid emau i erschter Linie vor dr Verchöiferin a dr Kasse,
sondern vor mir säuber.
So habe ich erkannt:
Es gibt kein größeres Glück bei den Menschen,
als sich zu freuen und sich’s gut gehen zu lassen.
Jeder Mensch soll essen, trinken und glücklich sein
als Ausgleich für seine ganze Arbeit.
Denn auch dies ist eine Gabe Gottes.
Steit im Buech Kohelet i dr Bible.
D Fröid, d Luscht, dr Gnuss.
Z Läbe äbe.
Es isch e Gab vo Gott.
Isch das vilech scho Rächfertigung gnue?
Wärtvorstellige ha, die verfouge,
sich aus Mönsch bezeichne, wo gloubt,
das isch doch e Fröid.
Und kei Zwang, kei Chrampf,
wo me sech muess uferlegge.
Das isch doch Glück.
Wüu me zMitzt drin darf si,
mit aune Müglechkeite,
und so viune Gründ d Fescht zfiire, wie si faue.
Mängisch isches asträngend.
Wüu me sech Gedanke zum Würum und Wieso macht.
Und derzue, was jiz äch die angere dänke.
Und mängisch duets guet das abzlegge.
Em eigete Richter zsäge, är chönni jiz chlei Homeoffice mache,
und beidi Ouge zuedrücke.
Wüu es isch scho rächt, so wies isch.
Das Zische vom Cola, weni z Dösli mit em Duume idrücke
und dr erscht Schluck nime.
Kommentare
Kommentar veröffentlichen