Ruheplätze

Dr See isch haub zuegfroore.

D Iis-Schicht isch dick gsi dä Winter

und isches a de schattige Steue immer no.

Dr Waud ume See isch stiu.

Nume ab und zue zwitscheret e früeche Frühligsvogu,

wo d Wermi nid cha erwarte.

D Füess loufe über Schneeräschte und weiche Waudbode.

D Tannenadle vom letschte Johr chöme zum Vorschiin.

Dr Bode verwachet.

Lang heter gschlofe i dr Cheuti, unger Iis und Schnee.

Es isch Zyt.

Zyt vom Verwache, vo dr Ungedoud,

vom letschte grosse Schnee,

vom nid wüsse was alegge,

wüu me immer entwäder zchaut oder zwarm het.

Es isch Zyt.

Zyt vom Plän schmide,

und Plän wieder müesse verwärfe.

Es isch e Zyt vom Warte.

Und ab und zue e Zyt vom nümme möge warte.

Der Herr leitet mich zu Ruheplätzen am Wasser,

dort erfrischt er meine Seele,

so heissts im Psaum 23 i dr Bible.

Rueh am Wasser. Erfrüschig für d Seeu.

Früsche Wind füre Geischt.

«Mini Seeu dürschtet nach Ustuusch und Kreativität»,

schribt mr eismau e Frou.

«I säge mr immer, üs geits doch guet. Mir si nid uf dr Flucht,

hei es Dach überem Chopf und öpis zÄsse im Buuch»,

seit e angeri Frou.

Beides isch wohr.

Ou we üse Körper nid Durscht muess liide,

cha üsi Seeu trotzdäm dürschte.

Nach Begägnig und Bewegig.

Gspräch und Usenangersetzig.

Isoliert si vo dr Wäut und de Mönsche

isch öpis vom Schlimmschte, wo üs cha passiere.

I dene und angerne Momänte e Ort zha,

wo me cha Läbenschraft tanke, isch wichtig.

Z Wüsse, was me cha mache, dass die Chraft wieder grösser wird i eim,

isch wichtig.

Der Herr leitet mich zu Ruheplätzen am Wasser,

dort erfrischt er meine Seele.

E Tanksteu für d Seeu.

A däm See im Waud.

Zwüsche Winter und Früehlig.

Waudbade. Ih- und usschnuufe.

D Stiui lose, zLäbe gspüre.

Em Wasser zueluege, wies dr Bach zdürabruuschet,

i See ine. 

Wies ruhig wird, eifach do isch.

A d Ränder vom Iis schwappt. Drunger verschwindet.

Es raschlet zwüsche de Böim.

Nid nume d Vögu hätte gärn langsam Früehlig.

Es Eichörndli flitzt e Boum zdürab,

huuschet zum Wasser,

luegt churz übere See

und verschindet wieder im Gebüsch.

Verbunde sii mit dr Wäut,

mit e Kreislouf vo Früehlig, Summer, Herbscht und Winter.

Verbunde si mit Gott, wo mit üs z Läbe

schöpferisch i de Häng hebt.

Erwartigsvou, erfrüscht, gstercht und ruhend.

Der Herr leitet mich zu Ruheplätzen am Wasser,

dort erfrischt er meine Seele.