Si isch do.
Mängisch isch si eifach do.
Si packt eim und loht eim nümme los.
I chare no so mängisch säge:
Es git kei Grund derfür, dass du a mire Site bisch.
Dass du di i mim Chopf ignischtet hesch.
D Angscht loht sech nid tüüsche,
weni ihre säge: Es git di nid.
Angscht cha Läbe rette.
Angscht scherft üsi Sinne, aktiviert Schutz- und Überläbensmechanisme.
Angscht isch kei guete Ratgäber
stimmt so äbe nid ganz.
Si ghört zu üs
wie Fröid und sogar Euphorie.
Aber Fröid und Euphorie si agnähmi Gfüeu,
si mache z Läbe liecht.
Was machi jiz auso mit dere Angscht
woni nid wot
aber immer mau wieder ha?
Angscht vor em Virus.
Angscht dervor, dass mim Ching öpis passiert.
Angscht, dasi nid gliebt wirde.
Angscht, dasi nid gnüege.
Angscht dervor am Morge ufzstoh, wüu nüt uf mi wartet, wo mir Sinn git.
Angscht vor em Stärbe.
Angscht vor dr Angscht.
Mit purem Wiue chani se nid besiege.
Mit rationale Gedanke verschwindet si nid.
Si isch hartnäckig.
Aber i bi hartnäckiger.
Wie dr chlii David, woner vor em grosse Goliath steit.
Vilech heter e Momänt lang dänkt: Was mach i do?
Wieso bini nid Deheime blibe?
I bi doch zchlii und nid so muetig wie aui die Manne,
wo scho probiert heit dä Angscht-Goliath zbesiege.
Vilech heter das dänkt.
Aber är probierts.
Är het nume e Steischlöidere.
Und i? I probieres ou.
Nid mit em Chopf,
sondern mit em Härz.
I lose i mi ine und gspüre, dases vou mit
Glückserfahrige isch.
Z Lache mit Fründe. Z Zämesii mit dr Familie.
Dr Momänt ganz äleini im Morgegraue uf em Fäud.
I lose i mi ine und gspüre:
Siti uf dr Wäut bi, hei mir Mönsche Chraft mitgä.
Indäm si a mi gloubt hei,
mi i d Arme gno,
mini Angscht ghört und mittreit hei.
Das isch die beschti Waffe gäge d Angscht.
Z Wüsse, dasi scho so viu gschafft ha,
scho so mängisch starch bi gsi.
Und dasi nid lei muess starch si.
Dasi mängisch darf schwach si
und mi darf lo trage vo dr Liebi um mi ume.
We dr Luscht heit, überleget öich hüt:
I welne Momänte i mim Läbe hani mi trotz Angscht gliebt und gstercht gfüeut.
I welne Momänte bini überglücklech gsi?
I wünsche üs, dass mr die Erinnerige mit düre Tag chöi nä.
Kommentare
Kommentar veröffentlichen