Schuld?

Wie hesch dus mit dr Schoud?

Sich schoudig füele.

Tschoud gä.

Beschoudige.

Bi dr Vorbereitig ufe Wäutgebätstag im März

het e Gruppe vo Froue über z Schoudbekenntnis diskutiert.

Froue us dr katholische Chiuche, dr mennonitische Gmeinschaft 

und dr reformierte Chiuche.

Aui Froue mit ungerschidleche Läbenserfahrige.

Aui Froue mit em Respäkt vor enang und em ächte Interässe am Dialog.

I hane Sorgfaut im Umgang dörfe erläbe, wo mi berüehrt het

und immer no berüehrt. 

I ha mi plötzlech wieder aus Teil vonere grosse Gmeinschaft gfüeut.

Froue uf dr ganze Wäut wei zäme fiire,

ihre Muet, ihri Sterchi fiire.

Froue uf dr ganze Wäut si verbunge inere länge Gschicht vo Ungerdrückig,

Ungliichbehandlig und Missbruch.

I dr Schwiz dörfe Froue sit 50 Johr wähle und abstimme.

Ersch sit 50 Johr.

Und hüt rede mr immer no vo Frouequote i Füehrigspositione und i sogenannte

«Männerbrüef». Rede vo dr Notwändigkeit vo Veriibarkeit vo Bruef und Familie.

Es Schoudbekenntnis?

Mir Reformierte wehre üs oft mit Häng und Füess dergäge.

Vo Sünd und Schoud und Vergäbig rede,

das schränkt schiinbar üse freiheitlech Geischt ih.

«Und vergib uns unsere Schuld, wie auch wir vergeben unseren Schuldigern»

Dä Teil us em Unser Vater bätte mr aber de glich.

I hane zwar aus Mitbätendi ou scho usgspart.

Wüui nid ane Gott gloube, wo si Sohn opferet für üsi Sünde.

Wüui nid gloube, dass mir heillosi Sünder si.

Und glich bruchts mängisch e Freispruch.

Z Wüsse, dass do eine oder eini oder öpis isch,

wo mi animmt, so wieni bi.

Wo mir d Freiheit git, über mi und mini Beziehige

zu de Mönsche und dr Wäut nochezdänke.

Wie hesch dus mit dr Schoud?

Schoud vergä.

Frei spräche.

Freispruch.

Für angeri, für sich säuber.

Mir heinis schlussändlech fürnes Schoudbekenntnis entschide.

Mit üsere eigete Formulierig.

Wüu Schoud bekenne ou Freiheit bedütet.

Vüre luege, 

nöi wärde

und gstercht wytergo.